ਐੱਸਪੀਐੱਨ ਕਾਲਜ ਦੇ NCC ਕੈਡੇਟ ਅੰਕਿਤ ਸਿੰਘ ਨੇ ਰਚਿਆ ਇਤਿਹਾਸ
ਮੁਕੇਰੀਆਂ,(ਰਾਜ਼ਦਾਰ ਟਾਇਮਸ): ਸਵਾਮੀ ਪ੍ਰੇਮਾਨੰਦ ਮਹਾਵਿਦਿਆਲਾ ਦੇ ਐੱਨ.ਸੀ.ਸੀ ਕੈਡਿਟ ਅੰਕਿਤ ਸਿੰਘ ਨੇ ਐੱਨ.ਸੀ.ਸੀ ਦੇ ਸਰਵੋਤਮ ਕੈਂਪ ਆਰਮੀ ਕੈਂਪ ਨੂੰ ਸਫਲਤਾਪੂਰਵਕ ਪਾਸ ਕਰਕੇ ਨਾ ਸਿਰਫ਼ ਕਾਲਜ ਦਾ ਸਗੋਂ ਐੱਨ.ਸੀ.ਸੀ ਜਲੰਧਰ ਗਰੁੱਪ ਦਾ ਨਾਮ ਰੌਸ਼ਨ ਕੀਤਾ ਹੈ। ਇਸ ਸਬੰਧੀ ਕਾਲਜ ਦੇ ਐੱਨ.ਸੀ.ਸੀ ਇੰਚਾਰਜ ਲੈਫਟੀਨੈਂਟ ਗੋਪੀ ਸ਼ਰਮਾ ਨੇ ਦੱਸਿਆ ਕਿ ਕਰੀਬ ਦੋ ਮਹੀਨਿਆਂ ਦੀ ਸਖ਼ਤ ਚੋਣ ਪ੍ਰਕਿਰਿਆ ਵਿੱਚੋਂ ਲੰਘਣ ਤੋਂ ਬਾਅਦ ਅੰਡਰ ਅਫਸਰ ਅੰਕਿਤ ਸਿੰਘ ਨੇ 19 ਸਤੰਬਰ ਤੋਂ 30 ਸਤੰਬਰ ਤੱਕ ਦਿੱਲੀ ਵਿਖੇ ਹੋਏ ਆਰਮੀ ਕੈਂਪ 2023 ਵਿੱਚ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕੀਤਾ। ਕਾਲਜ ਪ੍ਰਬੰਧਕ ਕਮੇਟੀ ਅਤੇ ਕਾਲਜ ਪ੍ਰਿੰਸੀਪਲ ਡਾ: ਸਮੀਰ ਸ਼ਰਮਾ ਨੇ ਅੰਕਿਤ ਸਿੰਘ ਅਤੇ ਐੱਨ.ਸੀ.ਸੀ ਵਿਭਾਗ ਨੂੰ ਵਧਾਈ ਦਿੱਤੀ। ਉਨ੍ਹਾਂ ਕਿਹਾ ਕਿ ਥਲ ਸੈਨਿਕ ਕੈਂਪ ਦਾ ਉਦੇਸ਼ ਫੌਜ ਦੀ ਸਿਖਲਾਈ ਦੀਆਂ ਮੁੱਖ ਵਿਸ਼ੇਸ਼ਤਾਵਾਂ ਨੂੰ ਪ੍ਰਦਾਨ ਕਰਨਾ, ਮੁਕਾਬਲੇ ਦੀ ਭਾਵਨਾ ਪੈਦਾ ਕਰਨਾ ਅਤੇ ਕੈਡਿਟਾਂ ਵਿੱਚ ਅਨੁਸ਼ਾਸਨ, ਅਗਵਾਈ ਅਤੇ ਰਾਸ਼ਟਰੀ ਏਕਤਾ ਦੀ ਭਾਵਨਾ ਨੂੰ ਉਤਸ਼ਾਹਿਤ ਕਰਨਾ ਹੈ। ਥਲ ਸੈਨਿਕ ਕੈਂਪ ਆਰਮੀ ਵਿੰਗ ਦੇ ਕੈਡਿਟਾਂ ਦਾ ਰਾਸ਼ਟਰੀ ਪੱਧਰ ਦਾ ਕੈਂਪ ਹੈ ਜਿਸ ਵਿੱਚ ਦੇਸ਼ ਭਰ ਵਿੱਚੋਂ ਵਧੀਆ ਪ੍ਰਦਰਸ਼ਨ ਕਰਨ ਵਾਲੇ ਕੈਡਿਟਾਂ ਦੀ ਚੋਣ ਕੀਤੀ ਜਾਂਦੀ ਹੈ। ਕਾਲਜ ਦੇ ਕੈਡਿਟ ਅੰਕਿਤ ਸਿੰਘ ਲਈ ਇਸ ਕੈਂਪ ਨੂੰ ਸਫਲਤਾਪੂਰਵਕ ਪਾਸ ਕਰਨਾ ਬਹੁਤ ਹੀ ਮਾਣ ਵਾਲੀ ਗੱਲ ਹੈ। ਅੰਡਰ ਅਫਸਰ ਅੰਕਿਤ ਸਿੰਘ ਨੇ ਹੋਰ ਐੱਨ.ਸੀ.ਸੀ ਕੈਡਿਟਾਂ ਨਾਲ ਵੀ ਆਪਣੇ ਤਜ਼ਰਬੇ ਸਾਂਝੇ ਕੀਤੇ ਅੰਤ ਵਿੱਚ ਐਨ.ਸੀ.ਸੀ ਇੰਚਾਰਜ ਲੈਫਟੀਨੈਂਟ ਗੋਪੀ ਸ਼ਰਮਾ ਨੇ ਕਾਲਜ ਪ੍ਰਬੰਧਕ ਕਮੇਟੀ ਅਤੇ ਕਾਲਜ ਪ੍ਰਿੰਸੀਪਲ ਡਾ.ਸਮੀਰ ਸ਼ਰਮਾ ਦਾ ਵਿਸ਼ੇਸ਼ ਸਹਿਯੋਗ ਦੇਣ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਨੇ 12 ਪੰਜਾਬ ਬਟਾਲੀਅਨ ਦੇ ਕਮਾਂਡਿੰਗ ਅਫਸਰ ਦਾ ਸਮੇਂ-ਸਮੇਂ ‘ਤੇ ਦਿੱਤੇ ਸਹਿਯੋਗ ਲਈ ਵੀ ਧੰਨਵਾਦ ਕੀਤਾ। ਇਸ ਮੌਕੇ ਪੀ.ਆਈ ਸਟਾਫ਼ ਦੇ ਨਾਲ ਐੱਨ.ਸੀ.ਸੀ ਕੈਡਿਟਾਂ ਦਾ ਸਮੂਹ ਵੀ ਹਾਜ਼ਰ ਸੀ।
